Die eerste plaag is rooi soos bloed.

Dit roof en moor

en vat jou goed

 

Die tweede plaag is wit soos was.

Met gepleisterde gesig

loop jy jou teen hom vas

 

Die derde plaag is pers soos wyn.

Dis bottels en pille

wat hulle laat krul van pyn.

 

Die vierde plaag is gryse graniet:

Koud en hard –

‘n onvergewensgesinde verdriet

 

Die vyfde plaag is geel soos goud.

Sonder liefde

slaap geld baie koud

 

Die sesde plaag is lief en sag.

Voor jy jou kom kry

druk sy jou rond teen haar borste vas.

 

Die sewende plaag is koud en hard.

Sonder familie en vriend –

eensaam en verward.

 

Die agtste plaag is ‘n geklaag en gekerm

van vrouens wat neul

en mans wat hulle nie beskerm

 

Die negende plaag so uit die hel

is mense wat tob

en oor alles hulle kwel.

 

Die tiende plaag is pikgit-swart.

Kinders op afdraaipaadjies

skeur ‘n ouerhart

 

Farao het Moses uiteindelik laat trek.

Vir ons is Jesus uit die graf opgewek.

 

Advertisements