Veranderings

“Paulus se teologie
klop vandag net nie”
Dis wat die ou mense sê:
“Want ons weet nie meer wat hy wil hê.”

Ons dog hy praat van hoede en geld -
nou hoor ons hy weet van strukturele geweld.
Ons dog hy praat van wyn en brood -
nou stuur hy ons na plakkers in hul nood.

Paulus se boodskap klop tog wel:
Om te doen soos Jesus is al wat tel.
Hy het sy dissipels se voete gewas -
Hy is die Draer van elke las -
Hy is die Een wat saam kan huil –
En ons word sy arms
in wie ander kan skuil

Nagmaal

Maria en Christus langs mekaar
tussen wyn en brood en kandelaar.
Vierde-eeuse liturgie:
Simbool en ritueel en misterie.

In vreemde gewade kom hul in
en preek en lees en laat ons sing.

Ek hoor ‘n klein outjie sê:
“Wat wil die omies nou eintlik hê?”

Paassondag

Vroue gaan om vir laas sy lyf
te balsem
en sommer net te huil.

Was alles dan leeg,
sinloos en verniet?
Here, die wêreld is so vuil!

Skielik gaan hulle staan
Kan dit dan wees?
Die graf is oop
Die lyk is weg
Ag heretjie tog -
wat kan ons nog tref?

Skielik staan Hy daar –
hulle kyk vir Hom.
“Maria” sê Hy sag.
Hulle staan verstom.

Dan borrel dit in hulle oor:
Die Here leef!
Ons het Hom nie verloor!

Vinnig hardloop om te vertel
vir die ander in hul pyn:
Ons Here leef –
Hy het self aan ons verskyn.

Goeie Vrydag

Van mens en God verlaat
Alleen.
Gehaat.

Onder lag speel soldate
hulle dobbelspel.
En in die strate
gaan alles aan
normaal –
mensehel.

Drie-uur skuif ‘n donker kring.
Voorhangsel skeur die grense oop.
Dit is volbring.
God is dood.

En by die kruis vra soldate stom:
“Was Hy miskien die Een wat kom?”

aanddiens

Here
Ek weet U soek nie getalle
U soek verhoudings
U soek diepte
U soek ore wat hoor

Hoekom is ek dan so verlam
teleurgesteld
as hier net ‘n paar opdaag?

Miskien moet ek begin waag
om oor te gee
te dryf
in U genade

Maak my oë oop
dat ek U kan sien
Amen

Aanskou die Heiland in die stal…

 (Om te sing oor kerstyd- op wysie van: Aanskou die Heiland sien die kruis)

 

AANSKOU DIE HEILAND SIEN DIE STAL

DIE KONING VAN DIE GROOT HEELAL

HOE HY HOM SO VIR MY VERLAAG

EN EK WIL NET MYSELF BEHAAG

 

DIE HERDERS KOM OM HOM TE EER

DIE WYSES KNIEL AANBIDDEND NEER

VOOR AARDSE HEERSERS MOES HY VLUG

‘N KONING OP ‘N DONKIERUG

 

IN STINKEND’ STAL HET HY KOM LY

HY GEE SY LEWE OOK VIR MY

DIE KRUIS SE SKADU OOR DIE KRIP

DIT IS TE HOOG VIR MY BEGRIP

 

HOM KAN EK NOU MET VREUGDE DIEN

IN RUIMTE DEUR SY KRUIS VOORSIEN

‘N LIEFDE SO VOLMAAK EN VRY

EIS ALLES, ALLES OOK VAN MY

(Laaste vers deur Attie van der Colf 2001 Liedboek 396)

Hoekom Here?

Hoekom dominee

kry ek so swaar?

Ek lewe dan mooi –

bring my kant.

Hoekom word ek

so diep ingestamp?

 

Teodisee –

Hoe moet ek die antwoorde gee?

Ek self wil ook maar vra

en voosgestamp by die Here kla.